Zëvendëskryeministri i Infrastrukturës, Hysen Durmishi ka njoftuar se sot është lëshuar uji në kanalin e Ibër Lepencit pas sulmit terrorist në nëntor të vitit të kaluar.

Ne llogarinë e tij në Facebook, Durmishi ka publikuar edhe disa fotografi nga ky kanal teksa është shprehur falënderues për kontributin, transmeton Arbresh.info

“Sot edhe zyrtarisht lëshohet uji në kanalin e Ibër Lepencit, pas sulmit terrorist që ndodhi në kanal. Jam i gëzuar dhe falënderues për të gjithë ata që kontribuan drejtëpërdrejt që kanali të sanohet dhe për asnjë moment qytetarët të mos mbesin pa rrymë e ujë”, ka shkruar Durmishi.

Shpërthimi që ndodhi më 29.11.2024 në kanalin e ujit të Ibër-Lepencit, në fshatin Varagë të Komunës së Zubin Potokut ishte cilësuar nga Qeveria e Kosovës si “sulm terrorist”.

Kryeministri i vendit, Albin Kurti, kishte thënë se sulmi është kryer nga grupe terroriste ndërsa presidenti serb, Aleksandër Vuçiq, e ka mohuar që Serbia ka lidhje me sulmin./Arbresh.info